Tatlong bayan sa Aurora, isolated

Balak ni Aurora Governor Gerardo Noveras na magdeklara na ng State of Calamity sa lalawigan matapos bayuhin ng bagyong Lando.

Ayon kay Noveras, isolated na ang mga bayan ng Dinalungan, Casiguran at Dilasag dahil sa mga pag-guho ng lupa.

Hindi na rin madaanan ang Baler-Casiguran Road. Wala pa ring komunikasyon ang provincial government ng Aurora sa tatlong bayan ayon kay Noveras.

Bahagyang bumuti na ang lagay ng panahon sa Aurora at sinimulan na ang clearing operations sa mga daan na may mga naputol na puno at gumuhong lupa.

Sa kasalukuyan ay nasa mahigit tatlong libong pamilya o sampung libong katao na ang nasa iba’t ibang evacuation centers.