Ngayong bumigat na ng husto ang kanyang responsibilidad matapos maitalagang bagong pinuno ng Senado, hindi na muna mapapanood si Sen. Tito Sotto sa programang Eat Bulaga.
Ayon kay Sotto, kakausapin niya ang mga co-hosts niya na sina Vic Sotto at Joey de Leon para ipaalam ang kanyang plano.
Dagdag pa nito, maging ang producer ng Eat Bulaga na si Tony Tuviera ay kailangan din niyang kausapin hinggil sa kanyang gagawing leave of absence sa pinakamatagal na programa sa Philippine TV.
Bago ito, nagagawa pa ni Sotto na magpakita sa Eat Bulaga sa mga araw ng Huwebes, Biyernes at Sabado at kapag suspindido ang sesyon sa Senado.
Samantala, sinabi ni Sotto na huwag munang husgahan ang kanyang liderato dahil ipakikita umano niya na karapat-dapat siya sa kanyang bagong posisyon sa Senado.