Hinimok ng mga kandidata para sa Miss Earth Philippines 2018 ang mga kandidato sa Barangay at Sangguniang Kabataan (SK) elections na tiyaking magiging “waste-free” ang panahon ng kampanya at ang mismong araw ng eleksyon.
Sa programang idinaos sa Commission on Elections (Comelec) sa Intramuros Manila, nakipagkaisa ang mga kandidata sa environmental group na EcoWaste coalition para manawagan sa mga kandidato sa pagkakaroon ng eco-friendly election.
Payo ng isang kandidata mula Cebu Ctiy na si Marla Alforque, mas mabuting gawin ng mga kandidato ang tradisyunal na pagbabahay-bahay kaysa gumamit ng maraming campaign materials gaya ng tarpaulins, posters at flyers.
Mas makabubuti pa aniya ito sa mga kandidato dahil personal silang makikilala ng mga botante.
Samantala, sinabi naman ni Daniel Alejandre, zero-waste campaigner ng EcoWaste Coalition, may ugnayan sila sa Comelec para sa pag-monitor ng mga campaign violations.
Kabilang aniya sa mga binabantayan ng kanilang grupo ang paglalagay ng campaign materials sa mga puno.
Dagdag pa ni Alejandre, ang mga plastic na ginagamit ng mga kandidato sa kanilang mga flyers ay kumakalat lamang at bumabara sa mga kanal.