Mga kandidato na sangkot sa droga huwag iboto ayon sa Malakanyang

Hinimok ng Malakanyang ang mga boboto sa May 14 Barangay at Sangguniang Kabataan elections na huwag suportahan ang mga kandidato na sangkot sa iligal na droga.

Ayon kay Presidential Spokesperson Harry Roque, inutusan na ni Pangulong Rodrigo Duterte ang Philippine Drug Enforcement Authority na ilabas ang listahan ng mga opisyal ng barangay na dawit sa droga.

Layon anya ng hakbang na makunsidera ng mga botante ang narco-list sa kanilang pagpili ng ibobotong kandidato.

Iginiit pa ng palasyo na tama ang paglalantad sa mga kandidato na may kuneksyon sa kalakalan sa ipinagbabawal na gamot.

Una nang sinabi ng PDEA na mayroong 211 barangay officials na nasa listahan at ilalabas nila ito sa susunod na mga araw.