Magtatalaga ng dagdag na tauhan ang Department of Social Welfare and Development (DSWD) sa Boracay Island para umasiste sa mga residente at manggagawa doon na nangangailangan ng financial assistance.
Ililipat din sa mas malaking lugar ang operational center ng ahensya matapos dagsain ng mga tao ngayong umaga.
Ayon kay DSWD-OIC Emmanuel Leyco, pinag-aaralan din nilang gawing 24/7 ang kanilang operasyon sa Boracay para ma-accommodate ang lahat ng nangangailangan ng tulong.
Sa datos, nakapag-release na ng P3 million na halaga ng tulong ang DSWD sa nasa 1,340 displaced workers ng Boracay as of alas 9:00 ng gabi kagabi.
Sa unang araw ng pagsasara ng isla kahapon, 600 na aplikante ang agad dumagsa sa operation center ng ahensya at ang iba, alas 5:00 pa lang ng umaga ay nakapila na.
Maximum na P5,000 na transportation assistance ang ibinibigay ng DSWD sa makapapasang aplikante na nais umuwi sa kanilang home provinces.
Nagbibigay din ng meal allowance ang DSWD sa mga nawalan ng hanapbuhay.