Pauwi na ang bansa ang 31 Pinoy na pawang naaresto at nakulong sa Indonesia dahil sa iba’t ibang kaso na kinasangkutan.
Ang mga Pinoy ay sakay ng Philippine Navy Ship na BRP Davao Del Sur at umalis ng Indonesian Navy wharf sa Bitung alas 8:00 ng umaga ng Biyernes, April 13 at nakatakda silang dumating sa Sasa Port sa Davao City sa April 21.
Isinagawa ang repatriation sa mga Pinoy sa pakikipag-ugnayan ng pamahalaan sa Ministry of Law and Human Rights sa North Sulawesi, at Immigration Offices sa Bitung, Tarakan, Balikpapan, at Manado kung saan nadakip ang mga nagkasalang Pinoy.
Walo sa mga pauwing Pinoy ay pawang boat captains na naaresto dahil sa ilegal na pangingisda at nakapanilbihan na ng sentensya, habang ang iba ay ilegal na namamalagi sa Indonesia.
Pinangunahan ng Philippine Consulate Office sa Manado, Indonesia ang repatriation sa pakikipagtulungan sa Armed Forces of the Philippines – Naval Fleet Eastern Mindanao Command (EASTMINCOM).