Mga nagkasala sa Dengvaxia controversy dapat managot sa batas – DOH

Hinimok ng Department of Health (DOH) ang Senado na tiyaking mapapanagot ang mga responsable sa pagbili sa P3.5 bilyong Dengvaxia at pagpaapatupad ng dengue immunization program.

Ipinahayag ng DOH na welcome sa kagawaran ang draft report ng imbestigasyon ng Senado sa naturang usapin.

Ayon kay DOH Secretary Francisco Duque III, ang “marching order” niya sa simula pa lang ay tumulong sa mga imbestigasyon sa dengue vaccination program.

Dagdag ni Duque, nakatuon ngayon ang kagawaran sa pagbibigay ng accessible health care sa higit 800,000 batang naturukan ng Dengvaxia.

Sa draft report ng Senate Blue Ribbon Committee, pinakakasuhan nito sina dating pangulong Noynoy Aquino, dating Budget secretary Florencio Abad, at dating Health secretary Janette Garin.