Dalawang miyembro ng parliament sa Kosovo ang nawalan ng malay matapos maghagis ng tear gas ang isa nilang kasamahang mambabatas habang nagsasagawa ng talakayan sa kasunduang nabuo sa pagitan ng gobyerno Kosovo at Serbia.
Karamihan sa mga mambabatas ay suportado ang nasabing kasunduan pero tutol ang oposisyon sa parliament.
Habang nagsasagawa ng pagtalakay at nag-iingay ang mga mambabatas na pabor sa kasunduan, bigla na lamang naghagis ng tear gas ang mambabatas na si Albin Kurti, at sinipa ito sa assembly floor dahilan para mapuno ng usok ang lugar.
Dalawang babaeng parliament member ang agad na nawalan ng malay at isinugod sa ospital.
Ang iba pang mambabatas na nahirapang huminga ay nilapatan ng lunas ng apat na ambulansya sa labas ng parliament.
Ang Kosovo ay nagdeklara ng independence sa Serbia noong taong 2008.
Tinututulan ng mga oposisyon sa parliament ang kasunduan sa pagitan ng Kosovo government at Serbia noong Agosto kung saan ang European Union ang namagitan.
Sa nasabing kasunduan, pumayag ang pamahalaan ng Kosovo na bigyan ng financial at legislative rights sa minority Serb community kabilang ang pagtatayo ng asosasyon ng Serb-run municipalities.