Isa pang panibagong batch ng Overseas Filipino Workers (OFWs) mula sa Kuwait ang nakauwi na sa bansa.
Sakay ng Qatar Airways flight QC 934 ang 109 na OFWs nang lumapag ito sa Ninoy Aquino International Airport kagabi.
Ayon sa panayam ng Philippine News Agency (PNA) kay DFA Office of Public Diplomacy Executive Director Charmaine Aviquivil, sinabi nitong target ng kagawaran na makapagpauwi ng 10,000 OFWs mula Kuwait hanggang April 22.
Anya, ang naturang petsa ay ang deadline ng extension ng amnesty program ng Kuwaiti government.
Samantala, umaabot na anya sa mahigit 4,000 OFWs ang naiuuwi sa bansa kabilang na ang panibagong batch kagabi ayon kay Aviquivil.
Ang repatriation ng mga pinoy workers sa nasabing bansa ay bunsod pa rin ng deployment ban na ipinatupad matapos ang mga ulat ng pang-aabuso sa pinoy workers partikular sa kinahinatnan ng Pinay OFW na si Joanna Demafelis.