Pep Squad ng Adamson University wagi ng gintong medalya sa kompetisyon sa Singapore

Nagwagi ng gintong medalya ang Pep Squad ng Adamson University sa Asia Cheerleading Invitational Championships 2018 na ginanap sa Singapore ngayong Sabado, March 31.

Sa Facebook page, inanunsyo ng Adamson University ang tagumpay ng kanilang cheering squad sa Pom Division.

Ang Asia Cheerleading Invitational Championships (ACIC) ay kompetisyon na bukas para sa lahat ng international teams sa mundo.

Mayroon itong iba’t ibang age divisions sa cheer levels at freestyle pom.

Magugunitang noong nakaraang taon, ang AdU Pep Squad ang itinanghal na UAAP Cheerdance Competition champions.