3 patay sa pagtaob ng isang truck sa Nueva Ecija

Patay ang tatlo katao kabilang ang isang tatlong taong batang lalaki at sugatan ang labing-tatlo matapos tumaob ang isang trak sa Brgy. Pias sa General Tinio, Nueva Ecija.

Ayon kay Sr. Insp. Adriano Gabrial, Hepe ng General Tinio Police, kakambyo sana ang driver ng truck pero hindi kumagat ang preno.

Dahil dito ay umatras ang sasakyan at tumaob, dahilan ng pagkasawi ng tatlong sakay ng truk na isang six by six Isuzu Van.

Napag-alaman na nasa pagitan ng dalawampu at tatlumpu ang sakay ng truck na papuntang Sitio Cunacon para sa isang pabasa.

Ginamot ang mga sugatan sa ospital sa General Tinio, apat sa mga ito ay nanatili pa rin sa ospital.

Kinasuhan na ng pulisya ang sumukong driver ng truck na si Joel Francia.