Magulang ng mga sumukong Aegis Juris members, umapelang panatilihin sa NBI ang kostodiya ng kanilang mga anak

Lumiham sa National Bureau of Investigation ang mga magulang ng 10 miyembro ng Aegis Juris fraternity na pawang akusado sa pagkamatay ng hazing victim na si Horacio “Atio” Castillo III.

Ito ay para hilingin sa ahensya na panatilihin sa kanilang kostodiya sina Arvin Balag, Mhin Wei Chan, Axel Munro Hipe, Oliver John Audrey Onofre, Joshua Joriel Macabali, Ralph Trangia, Robin Ramos, Jose Miguel Salamat, Danielle hans Matthew Rodrigo at Macelino Bagtang.

Ayaw ng magulang ng mga sumukong akusado na mailipat ang mga ito sa kostodiya ng Manila Police District (MPD).

Anila, hindi magiging ligtas ang kanilang mga anak kapag sila ay nailipat sa MPD.

Ito ay dahil ang MPD umano ang isa sa mga complainants sa kaso.

Hiniling din ng mga magulang sa NBI na ipabatid sa Manila Regional Trial Court ang kanilang pagtutol na mailipat sa MPD ang kanilang mga anak.