Nagkaroon ng aberya ang Philippine National Railways (PNR) sa Maynila.
Sa panayam ng Radyo Inquirer kay Gabriel John Humilde, pasahero ng PNR, kaalis lamang ng tren sa Paco Station Southbound bandang alas-2:00 ng hapon nang makarinig sila ng malakas na pagkalabog.
Dito na nalaman ng mga pasahero na nadiskaril ang kanilang sinasakyang tren.
Inabot pa ng ilang minuto aniya bago binuksan ang pinto sa magkabilang dulo ng tren makaraang may ma-suffocate umano na pasahero.
Dito na nakalabas ng tren ang mga pasahero na naglakad sa riles pabalik ng Paco Station para hintayin ang kasunod na tren habang ang ilan naman ay sumakay na ng ibang alternatibong masasakyan sa lugar.
Kaugnay nito, kinumpirma ng pamunan ng PNR ang insidente ngunit sa ngayon ay wala pang opisyal na pahayag.
Nagpadala na ng mga tauhan ang PNR para aksyunan ito.
