Pagbasura ng prosecution panel sa drug cases ni Kerwin Espinosa, hindi pa dumadaan sa review ni Aguirre

Hindi pa sumasailalim sa review ni Justice Sec. Vitaliano Aguirre II ang ginawang pagbasura ng prosecution panel sa kasong may kaugnayan sa ilegal na droga laban kay Kerwin Espinosa, Peter Lim at Peter Co.

Ito ay sa kabila ng December 20, 2017 pa nang madesisyonan ng prosecution team ng DOJ ang nasabing kaso.

Sa panayam ng Radyo Inquirer, sinabi ni Aguirre, mahahawakan lang niya ang kaso kapag mayroon nang naghain ng petition for review.

Sa ngayon aniya, hindi pa niya maaring pakialaman ang kaso at hindi rin siya pwedeng magbigay ng pahayag tungkol sa merito ng kaso.

Tiniyak naman ni Aguirre na aaraling mabuti ang kaso sa sandaling makarating na ito sa kaniyang tanggapan.