2 bangkay na natabunan sa landslide sa Bohol, narekober na

Nahukay na sa wakas ang mga bangkay ng dalawang lalaking na-trap at nasawi sa nangyaring landslide sa Anda, Bohol.

May ilang oras din na pagitan ang pagkaka-rekober ng mga rescuers sa mga bangkay nina Ariel Abac at Valeriano Galeya.

Silang dalawa ang bukod-tanging nasawing biktima sa pagguho ng lupa sa limestone quarry sa naturang bayan noong Lunes.

Kinailangan pang pandadaliang ipagpaliban ng mga rescuers ang paghahanap, at nahirapan din silang isagawa ito dahil sa posibilidad ng isa na namang landslide.

Bagaman hindi naman umuulan sa lugar nang mangyari ang insidente, hinihinalang lumambot ang lupa dahil sa matinding pag-ulan na idinulot ng bagyong Basyang kamakailan.