Guro arestado matapos magpaputok ng baril sa paaralan sa north Georgia

Arestado ang isang guro sa Dalton High School sa north Georgia matapos siyang magpaputok ng baril sa loob ng silid-aralan.

Nakilala ang guro na si Randall Davidson, 53 taong gulang.

Naganap ang insidente dakong 11:30 ng umaga, oras sa Georgia, nang magkulong si Davidson sa classroom at tumangging magpapasok ng mga estudyante.

Nang magdesisyon ang principal na gamitan na ng susi ang silid-aralan, doon na nagpaputok ng handgun si Davidson sa bintana na nakaharap sa labas ng kwarto.

Agad na nagpatupad ng lockdown ang paaralan na sinundan ng mabilis na pag-responde ng mga pulis para mailikas ang mga nasa paligid ng classroom.

Makalipas ang nasa 30 hanggang 45 minuto, kusa nang sumuko si Davidson sa mga pulis.

Ayon kay police spokesman Bruce Frazier, wala silang nakikitang ebidensyang nagpapakitang may balak talaga si Davidson na paputukan ang sinuman.

Mapalad namang walang nasaktan dahil sa pagpapaputok ni Davidson ng baril, pero mayroon lang isang estudyante na natapilok matapos tumakbo dahil sa insidente.