Hindi pinagbigyan ng Sandiganbayan 1st division ang mosyon na inihain ng kampo ni dating Senador Bong Revilla na humihiling na maipagpaliban ang kanilang pagpipresenta ng ebidensya.
Ngayon sana ang unang araw para sa panig ng depensa na mag-presenta ng ebidensya sa korte para sa plunder case na kinakaharap ng dating senador dahil sa maanomalyang PDAF scam kasama ang mga kapwa akusadong sina Janet Lim Napoles at kanyang dating chief of staff na si Richard Cambe.
Gayunman, hindi pa handa ang kampo ni Revilla para sa presentation of evidence at sa halip nais nilang hintayin na lamang muna ang aksyon ng Korte Suprema sa hinihingi nilang temporary restraining order.
At dahil hindi handa, kinansela na lamang ang apat na araw na magkakasunod na pagdinig na para sana sa presentation of evidence ng depensa, ito ay ang pagdinig ngayong araw, Feb. 15, at ang mga pagdinig sa Feb. 20, 22 at 27.
Kahit kanselado na ang apat na magkakasunod na pagdinig, babawasan pa rin ng 4-days ang 60 trial days ng senador dahil sa pagbasura ng korte sa kaniyang mosyon.
Itinakda naman sa March 6 ang susunod na pagdinig sa kanyang kaso.