Sinibak na sa pwesto ni National Capital Region Police Office (NCRPO) Director Oscar Albayalde ang mga hepe ng pulisya sa Pasay City at Muntinlupa City.
Ito ay makaraang maaktuhan ni Albyalde ang ilang pulis sa Police Community Precinct (PCP) sa nasabing mga lugar na nag-iinuman at tulog habang sila ay naka-duty.
Ang sinibak ay sina Pasay City Police chief, Sr. Supt. Dionisio Bartolome at si Muntinlupa City Police chief, Sr. Supt. Dante Novicio.
Ayon kay Albayalde, bilang prinsipyo ng ‘command responsibility’ dapat managot din ang mga hepe ng pulis na nadatnang nagpapabaya sa tungkulin.
Samantala, inalis din sa pwesto ang chief of police ng San Juan City na si Sr. Supt. Lawrence Coop dahil naman sa kabiguang maabot ang target performance matrix ng PNP.