Death toll sa patuloy na pag-ulan sa mga lalawigan umakyat na sa 16
Umaabot na sa 16 katao ang naitalang nasawi dahil sa mga tuloy-tuloy na pag-ulan sa bahagi ng Samar at Leyte.
Ayon kay National Disaster Risk Reduction and Management Council (NDRRMC) Spokesperson Mina Marasigan, bagaman walang bagyo sa loob ng bansa ay tatlong weather systems naman ang umiiral sa ngayon.
Kabilang dito ang amihan sa Hilaga at gitnang bahagi ng Luzon, tail-end ng cold front sa Silangang bahagi ng Southern Luzon, at ang Low-Pressure Area (LPA) sa Eastern side ng bansa na nagdudulot ng mga pag-ulan.
Umaabot naman sa 12 landslide incidents at flashfloods rin ang naitala, at aabot sa 1,875 na pamilya ang inilikas sa Eastern Samar, Northern Samar, Samar, at Leyte.
Samantala, sa 16 na nasawi, apat rito ay mula sa Tacloban City, 4 mula Compostela Valley, isa mula Silvino Lobos, Northern Samar, isa rin ang nasawi mula Catarman, dalawang mula sa bayan ng Pantar, Lanao del Norte, isa mula sa Caramoan, Camarines Sur, at 3 mula sa Camarines Norte.
Ayon sa NDRRMC, sumisikat na rin umano ang araw sa mga inulang lugar sa Samar at Leyte, at nagsisimula nang bumaba ang tubig baha.
Payo ni Marasigan sa publiko, kahit walang umiiral na bagyo, ugaliin pa rin makibalita sa lagay ng panahon upang matiyak ang kanilang kaligtasan.
Disclaimer: The comments uploaded on this site do not necessarily represent or reflect the views of management and owner of Cebudailynews. We reserve the right to exclude comments that we deem to be inconsistent with our editorial standards.