Sen. Juan Ponce Enrile, pansamantalang nakalaya, balik trabaho sa Senado sa Lunes
Pansamantalang nakalaya na si Senator Juan Ponce Enrile makaraang magbayad ng piyansa ngayong hapon ng Huwebes sa Sandiganbayan Third Division.
Mag-aalas sais ng gabi nang lumabas ng PNP General Hospital ang senador upang magtungo sa Sandiganbayan upang maghain ng kanyang piyansa.
Dakong Alas 6:30 ng gabi, kasama ang kanyang mga abugado at security, dumating si Enrile sa Sandiganbayan.
Nagbayad ng piyansa ang mga abogado ng 91-anyos na si Enrile na nagkakahalaga ng 1 milyon piso para sa kasong kinakaharap nito na pandarambong at 450,000 pesos naman sa 15 counts ng graft.
Nakalaya ang senador matapos bumoto ng 8-4 ang mga Mahistrado ng Supreme Court pabor sa bail plea ni Enrile noong Martes.
Matatandaang noong September 2014 ay naghain ng petition to post bail ang kampo ni Enrile. – Isa-Avendaño-Umali, Jan Escosio, Jen Pastrana, Jay Dones
Disclaimer: The comments uploaded on this site do not necessarily represent or reflect the views of management and owner of Cebudailynews. We reserve the right to exclude comments that we deem to be inconsistent with our editorial standards.