Ipinaalala ng Department of Education (DepEd) sa mga pampublikong elementary at secondary school na dapat simple lamang ang mga graduation ceremonies.
Ayon kay DepEd Sec. Leonor Briones, ito ang nakasaad sa inilabas nitong Department Order (DO) No. 8, series of 2017, alinsabay sa pinaiiral na austerity program ng pamahalaan.
Dagdag ni Briones, bagamat isang malaking milestone ang graduation para sa mag aaral, hindi ito dapat na gastusan ng malaki, gamitan ng magarbong kasuotan at idaos sa mamahaling lugar.
Para sa school year 2016-2017, naglabas ang DepEd ng mga alituntunin para sa graduation rites kabilang ang pagdaraos ng simpleng seremonya na limitado sa mga estudyante, magulang at paaralan lamang.
Ipinaalala din ng DepEd na ang mga non-academic projects tulad ng pagpunta sa mga field trips, film showing, junior-senior promenade, at iba pang aktibidad ay hindi dapat na gamitin rekisito para maka-graduate ang isang mag aaral.
Sinabi din ni Briones na lahat ng gastusin sa mga public schools ay dapat na kunin mula sa School Maintenance and Operating Expenses (MOOE) sa ilalim ng 2017 budget.
Hindi rin aniya dapat na mangolekta ang mga DepEd personnel ng graduation fee o anumang kontribusyon maliban sa donasyon na aprubado ng Parents and Teachers Association (PTA).
Ang kontribusyon naman para sa yearbook ay dapat boluntaryo lamang.
Disclaimer: The comments uploaded on this site do not necessarily represent or reflect the views of management and owner of Cebudailynews. We reserve the right to exclude comments that we deem to be inconsistent with our editorial standards.