Mga napapatay sa anti-drug operations ng PNP patuloy sa pagdami
Pumalo na sa 2,102 ang kabuuang bilang ng mga drug suspects na napapatay sa ilalim ng Project Double Barrel Alpha ng Philippine National Police.
Sa tala ng PNP, mula July 1 hanggang Dec 14 ng taong kasalukuyan ay umakyat na sa 40,932 na mga drug suspects ang naaresto sa kabuuan na 38,913 na ikinasang anti-illegal drugs operations.
Pumalo naman sa kabuuang 908,244 ang mga sumuko mga drug suspects kung saan 70,848 dito ay mga pushers habang 837,396 ay mga users o drug addicts.
Samantala, nanatili naman sa 19 ang mga KIPO o killed in police operations habang 55 ang sugatan sa panig ng PNP habang 3 naman ang napapatay sa mga sundalo at 8 ang nasugatan.
Sa panahon ng Kapaskuhan ay magpapatuloy pa rin ang mga anti-illegal drug operations ng PNP.
Nauna nang nilinaw ng pamunuan ng pambansang pulisya na walang kinalaman sa mga anti-drug operations ang hindi paglalagay ng mga tape sa mga baril ng mga pulis sa pagsalubong sa Bagong Taon.
Disclaimer: The comments uploaded on this site do not necessarily represent or reflect the views of management and owner of Cebudailynews. We reserve the right to exclude comments that we deem to be inconsistent with our editorial standards.