“Ma’ Rosa”, official entry ng Pilipinas sa Oscars
Ang pelikula ni Direk Brillante Mendoza na “Ma’ Rosa” ang magiging opisyal na entry ng Pilipinas sa 89th Academy Awards o Oscars sa susunod na taon.
Kinumpirma ni Leo Martinez, pinuno ng Film Academy of the Philippines ang naturang balita.
Magiging official entry aniya sa Best Foreign Language Film category ang “Ma’ Rosa”.
Matatandaang sa naturang pelikula, nanalo bilang best actress si Jacklyn Jose sa Cannes Film Festival noong nakaraang Mayo.
Kasalukuyan itong ipinapalabas sa Toronto International Film Festival sa Canada.
Masayang-masaya naman si Mendoza sa pagkakapili ng FAP sa kanyang pelikula upang maging entry sa Oscars na magaganap sa Feb. 2017.
Bukod sa “Ma’ Rosa” pinagpilian din bilang maging entry ng Pilipinas sa best foreign language film ang mga pelikulang “Felix Manalo” ni Joel Lamangan, “Anino sa Likod ng Buwan” ni Jun Robles Lana, “Honor Thy Father” ni Erik Matti, “Hele sa Hiwagang Hapis” ni Lav Diaz, “Dukot” ni Paul Soriano, “Pamilya Ordinaryo” ni Eduardo Roy Jr; “Ang Hapis at Himagsik ni Hermano Puli” ni Gil Portes at “Tuos” ni Roderick Cabrido.
Disclaimer: The comments uploaded on this site do not necessarily represent or reflect the views of management and owner of Cebudailynews. We reserve the right to exclude comments that we deem to be inconsistent with our editorial standards.