LP, lalagda na sa Coalition Agreement sa supermajority sa Kamara
Tuloy na tuloy na ang pirmahan ng pakikipag-koalisyon ng Liberal Party sa supermajority sa Mababang Kapulungan ng Kongreso.
Ayon kay Ilocos Norte Rep. Rodolfo Fariñas, incoming House Majority Leader, ang lagdaan ng Coalition Agreemeent ay magaganap mamayang gabi, sa isang hotel sa Makati City.
Ito’y batay na rin aniya sa palitin nila ng text messages ni LP stalwart at ex-House Speaker Feliciano Belmonte Jr.
Dagdag ni Fariñas, nasabihan na hinggil sa pirmahan ng Coalition Agreement sina incoming House Speaker Pantaleon Alvarez, maging si Senador Koko Pimentel, na kapwa lider ng PDP-Laban.
Kahapon, kinumpirma mismo ni Belmonte na nilaglag na niya ang naunang planong pagsabak sa speakership race o lider ng Minorya.
Sa halip ay sasama na ang LP sa supermajority at susuportahan ang mga isusulong sa Kongreso ng Duterte administration.
Paglilinaw naman ni Belmonte, nakunsulta ang mga miyembro ng LP sa naturang hakbang, gaya ni dating Pangulong Noynoy Aquino.
Disclaimer: The comments uploaded on this site do not necessarily represent or reflect the views of management and owner of Cebudailynews. We reserve the right to exclude comments that we deem to be inconsistent with our editorial standards.