Balik Bilibid ang isang presong tumakas noon pang 1986 at nagawa pang maging American citizen sa loob ng mahigit 30 taon.
Nahatulan ng habambuhay na pagkakulong si Rommel Ventura Lachica noong 1979 sa salang robbery with homicide at ikinulong sa New Bilibid Prison sa Muntinlupa City, ngunit nakatakas rin noong March 18, 1986.
Ayon kay Senior Supt. Joel Pernito na hepe Criminal Investigation and Detection Group (CIDG)-CALABARZON, na-trace si Lachica sa St. Francis Subdivision sa Cainta matapos niyang umuwi dito mula sa United States para bisitahin ang kaniyang mga kaanak.
Napag-alaman ng mga otoridad na nakapunta pala si Lachica sa Los Angeles, California matapos niyang tumakas, at naging American citizen pa siya noong 1990 sa ilalim ng alyas na Rommel Reyes Agoncillo.
Gayunman, napasama pa sa kaniya ang pag-uwi sa bansa matapos ang pagtatago dahil naaresto rin siya agad ng mga otoridad at ibinalik na sa Bilibid para ipagpatuloy ang kaniyang sintensya kasabay ng pagharap sa panibagong kasong may kaugnayan sa kaniyang pagtakas.
Nahaharap siya ngayon sa mga kasong illegal use of alias at falsification of public documents./Kathleen Betina Aenlle
Disclaimer: The comments uploaded on this site do not necessarily represent or reflect the views of management and owner of Cebudailynews. We reserve the right to exclude comments that we deem to be inconsistent with our editorial standards.