Benham Rise nais ni Sen. Francis Tolentino na binyagan na Philippine Rise
Naghain ng panukala si Senator Francis Tolentino para kilalanin na Philippine Rise o Talampas ng Pilipinas ang Benham Rise.
Paliwanag ni Tolentino, ito ay upang maigiit ng Pilipinas na ang 13 million hectare plateau na malapit sa lalawigan ng Aurora, ay bahagi ng teritoryo ng bansa.
Dagdag pa niya layon ng inihain niyang Senate Bill No. 2235 na maprotektahan ang ating pambansang interes at ayon sa Executive Order No. 25 ni Pangulong Duterte.
Nakapaloob din sa panukala ang pagpapangalan sa natatanging 22 laman-dagat na matatagpuan sa naturang bahagi ng Philippine Sea.
Nais ng senador na sa mga komunikasyon, anunsiyo at mensahe na tutukoy sa nabanggit na lugar ay kikilalanin na itong Philippine Rise o Talampas ng Pilipinas.
Ibinahagi ni Tolentino na ang Philippine Rise ay may lalalim na 2,000 metro hanggang 5,000 metro.
“Article 77 of the UNCLOS provides that a coastal state has sovereign rights over its continental shelf for the purpose of exploration and exploiting its natural resources,” ang pagbabahagi pa ni Tolentino.
Iginiit niya walang bansa ang maaring magsagawa ng exploration activities sa Philippine Rise ng walang awtorisasyon ng gobyerno ng Pilipinas.
Ang China una nang binigyan pangalan ang limang laman-dagat sa Philippine Rise at ayon kay Tolentino, paglabag na ito sa deklarasyon ng United Nations Commission on the Limits of the Continental Shelf (UNCLCS).
Disclaimer: The comments uploaded on this site do not necessarily represent or reflect the views of management and owner of Cebudailynews. We reserve the right to exclude comments that we deem to be inconsistent with our editorial standards.