Bayanihan 3 magbibigay ng malaking tulong sa ekonomiya at mga nasapol ng COVID-19

Kumpyansa si House Committee on Social Services chairman Alfred Vargas na malaki ang maitutulong ng Bayanihan 3 sa ekonomiya at “social relief” sa mga Pilipinong lubhang apektado ng COVID-19 pandemic. Ayon kay Vargas, sa pamamagitan ng Bayanihan 3 ay maisusulong ang panibagong sigla sa ekonomiya ng bansa habang binibigyan din ng pag-asa ang mga tao para maka-ahon mula sa hirap na dala ng pandemya. Inihalimbawa ng mambabatas ang ilang nakapaloob sa panukala na nag-aalok ng iba’t ibang uri ng tulong upang matiyak na hindi lamang mabibigyan ng pinansyal na ayuda ang mga tao, kundi magsisiguro na mayroong sapat na suplay ng pagkain, at matutugunan ang mga pangangailangang-medikal ng mga benepisyaryo. Ibinida pa ni Vargas ang isinusulong na alokasyon para sa medical assistance sa mga mahihirap; libreng swab test para sa overseas Filipino workers (OFWs), pondo para sa pension and gratuity ng military at iba pang unipormadong personnel; at budget para sa information technology para programa ng Department of Education. Kahapon, lumusot sa komite sa Kamara ang panukalang Bayanihan 3.

TAGS: Bayanihan 3, COVID-19, House Committee on Social Services Chairman Alfred Vargas, pandemic, social relief, Bayanihan 3, COVID-19, House Committee on Social Services Chairman Alfred Vargas, pandemic, social relief