Tax-free COVID-19 vaccine isinusulong sa Kamara
Isinusulong ni BHW Rep. Angelica Natasha Co na gawing “tax-free” ang mga bakuna kontra COVID-19.
Sa ilalim ng House Bill 8584 o Anti-COVID-19 Testing, Treatment, and Local Manufacturer Affordability Act of 2021 nais ni Co na amyendahan ang National Internal Revenue Code upang ang lahat ng mga COVID-19 vaccine, mga gamot, testing kits at lahat ng mga kailangang gamit, materyal at kahalintulad sa paglaban sa naturang sakit ay bmaging tax-free o walang buwis.
Ito ay kahit pa saang galing na bansa, manufacturer at kung para sa public vaccination program o pribadong pagbabakuna ng sinumang health professional.
Ayon kay Co, kapag sinabing tax-free — ito ay walang import duties at administrative fees, zero-Value Added Tax o VAT, at iba pang sales, business at lokal taxes o buwis.
Posible rin aniya na makapag-produce ng mga bakuna sa Pilipinas gaya sa industrial estates sa ilalim ng lisensyadong orihinal na manufacturers, kaya mainam na maging tax-free ito kasama na ang mga materyal, equipment at mga suplay pa rito.
Paliwanag ni Co, upang matiyak ang kalusugan, kaligtasan at pag-angat ng ekonomiya — kailangang maisantabi ang anumang hadlang kasama ang mga gastos upang maging epektibo ang implementasyon ng COVID-19 vaccination program sa bansa.
Disclaimer: The comments uploaded on this site do not necessarily represent or reflect the views of management and owner of Cebudailynews. We reserve the right to exclude comments that we deem to be inconsistent with our editorial standards.