$81-M, pinayagang ma-withdraw ng RCBC kahit may stop order
Hinayaan at pinayagan lang ng Rizal Commercial Banking Corp. (RCBC) ang pagwi-withdraw sa napakalaking pondong hinihinalang ninakaw mula sa Bangladesh central bank, sa kabila ng ipinadalang stop order ng Federal Reserve Bank of New York (FRBNY).
Nabunyag ang detalyeng ito sa imbestigasyon ng Senate blue ribbon committee tungkol sa $81 million money laundering activity na bumulabog sa mga bangko at pati na rin sa kredibilidad ng mga batas ng bansa laban sa dirty money.
Sinabi ni Sen. Teofisto Guingona III na nakatanggap ang RCBC ng “stop payment” order mula sa FRBNY noong February 8, alas-5 ng hapon, na isang holiday sa Pilipinas dahil sa Chinese New Year.
Ngunit lumalabas na hindi agad ito pinuna at sinunod ng RCBC kinabukasan, Feb. 9 na unang banking day pagkatapos ng holiday, dahil tumugon umano ang RCBC ganap na alas-7:45 na ng gabi.
Giit ni Guingona, napigilan sana ang pag-withdraw sa malaking pera noong February 9, kung pinansin agad ng RCBC ang order ng FRBNY.
Pinagpaliwanag ni Guingona si RCBC president ang CEO Lorenzo Tan kung bakit ganoon ang nangyari, ngunit ang sinagot lamang niya ay na hindi niya partikular na maaring idetalye tungkol sa transaksyon dahil sa bank secrecy law.
Gayunman, nilinaw ni Tan na kapag may freeze order sa isang account, dapat sundin ito ng branch manager, at ang tinutukoy niya rito ay si Jupiter branch manager Maia Deguito.
Iginiit rin naman ni Deguito ang Bank Secrecy Law kaya hindi siya makapagbigay ng mga detalyeng hinihingi sa kaniya, kaya humiling siya ng executive session.
Dismayado at nainis si Guingona dahil sa parehong pag-giit ng dalawang panig sa Bank Secrecy Law, at ipinunto ang kapalpakan ng bangko na sundin ang request ng FRBNY na pigilan ang transaksyon at huwag payagang mailabas ang kontrobersyal na pondo.
Ani Guingona, kung napigilan ang transaksyon, baka naprotektahan pa at hindi nawala ang $58 million sa $81 million na nailabas sa bangko.
Ipagpapatuloy ng Senado ang imbestigasyon sa Huwebes, (Mar. 17) na inaasahang tutuon sa pag-amyenda sa Anti-Money Laundering Act (AMLA) para patalimin ang pangil nito laban sa mga susunod pang magaganap na money laundering.
Disclaimer: The comments uploaded on this site do not necessarily represent or reflect the views of management and owner of Cebudailynews. We reserve the right to exclude comments that we deem to be inconsistent with our editorial standards.