Tunnel boring machines na gagamitin sa Metro Manila subway ipasisilip ng DOTr sa publiko bukas
Inanunsyo ngayon ng Department of Transportation ang pagpapasilip sa aktwal na tunnel boring machines na gagamitin sa paggawa ng kauna-unahang subway sa Metro Manila.
Ayon kay Transport Assistant Secretary Goddes Hope Libiran, ganap na alas 2:00 hanggang alas 4:00 ng hapon makikita ito ng publiko sa facebook page ng DOTr.
Manggagaling anya sa bansang Japan ang live na video ng TBM na ipadadala sa Pilipinas.
Sabi ni Libiran, anim na TBM ang dadalhin sa Pilipinas para sa partial operability section ng Metro Manila Subway Project.
Nauna ng sinimulan ang kontruksyon ng P393-B Metro Manila subway na itinuturing na ‘project of the century’ para sa Pilipinas.
Inaasahan ang partial operability nito sa taong 2022 at full operation sa 2025.
Mayroong 35 kilometrong haba ang subway mula sa Quezon City hanggang Ninoy Aquino International Airport sa Pasay City.
Kapag naging fully operational, magiging 40-minuto na lamang ang travel time mula Quezon City hanggang NAIA mula sa kasalukuyang mahigit dalawang oras.
Inaasahan ng DOTr na maseserbisyuhan nito sa initial operation ang 370,000 na mananakay kada araw.
Disclaimer: The comments uploaded on this site do not necessarily represent or reflect the views of management and owner of Cebudailynews. We reserve the right to exclude comments that we deem to be inconsistent with our editorial standards.