PNP-SAF, isinalang sa life saving techniques ng US troops
Inumpisahan na ng mga sundalong Amerikano na isalang sa anim na buwang pagsasanay ang mga miyembro ng Special Action Force sa ilalim ng Enhanced Defense Cooperation Agreement o EDCA.
Sa ilalim ng Special Action Force Commando Course, binibigyan ng training ang mga miyembro ng SAF sa tactical combat care o life saving support techniques.
Ayon kay Chief Supt. Miguel Antonio, Jr., Director ng Western Mindanao Police Office, isinasagawa ang pagsasanay sa loob ng Zamboanga Ecozone and Freeport Authority sa lungsod.
Nasa 100 personnel ng SAF ang dumadaan sa life saving training na mahalaga sa kanilang pang-araw araw na tungkulin .
Ayon naman kay Supt Reynald Ariño, commander ng 5th SAF Battalion, maihahambing sa military training ang binibigay na pagsasanay ngayon sa kanyang mga tauhan sa pangunguna ng US forces.
Bukod sa mga tropa ng SAF sa Mindanao, may kahalintulad ding pagsasanay na ginagawa ngayong para sa mga personnel na nakadeploy sa Luzon at Visayas.
Nilinaw naman ni Ariño na tanging tactical combat care lamang ang itinuturo ng mga sundalong Amerikano sa mga SAF at hindi kabahagi nito ang counter-terrorism training.
Matatandaang mga miyembro rin ng Special Action Force ang nagsagawa ng Oplan Exodus noong January ng nakaraang taon sa Mamasapano, Maguindanao.
Bagama’t napatay sa operasyon ang teroristang si Marwan o Zulkifli in Hir, nalagasan naman ng 44 na commandos ang SAF sa tinaguriang Mamasapano incident.
Disclaimer: The comments uploaded on this site do not necessarily represent or reflect the views of management and owner of Cebudailynews. We reserve the right to exclude comments that we deem to be inconsistent with our editorial standards.