Mga nasa likod ng anomalya sa pag-imprenta ng librong maraming mali dapat mapanagot ayon sa minorya sa Kamara
Iginiit ng minorya sa Kamara na hindi dapat mapalagpas at kailangang may mapanagot sa nadiskubreng milyun-milyong libro ng Department of Education (DepEd) na naka-imbak lang sa mga bodega at ang iba ay maraming mali.
Ayon kay House Minority Leader Bienvenido Abante, posibleng maharap sa kasong plunder ang mga opisyal ng DepEd kung mapatutunayang nagkaroon ng katiwalian at kapabayaan kaya’t hindi napakinabangan ang mga libro.
Nanghihinayang ang kongresista sa nasasayang na pondo ng gobyerno sa pagpapa-imprenta ng mga libro ngunit tadtad naman ng mali at hindi nagagamit.
Kung magpapatuloy aniya ang pagpapagamit ng mga librong maraming error, mangangahulugan ito na maling aralin din ang maituturo sa mga estudyante.
Kasabay nito ay ikinakasa na ang paghahain ng resolusyon sa Kamara upang magkaroon ng pormal na imbestigasyon sa ibinunyag ng Commission on Audit (COA) na mahigit 3-milyong libro na nagkakahalagang P113-milyon na hindi nagagamit at P254-milyong halaga ng Grade 3 learning materials na umano’y maraming error o mali ang pagkakasulat.
Disclaimer: The comments uploaded on this site do not necessarily represent or reflect the views of management and owner of Cebudailynews. We reserve the right to exclude comments that we deem to be inconsistent with our editorial standards.