Halos P3 rollback sa presyo ng petrolyo epektibo na ngayong Martes
Epektibo na ngayong araw ng Martes June 11 ang halos P3 rollback sa presyo ng produktong petrolyo.
Alas 6:00 ng umaga ay may tapyas na P2.70 sa kada litro ng diesel at P2.45 sa kada litro ng gasolina ang Shell, Total, PTT Philippines at Petron.
Habang ang presyo ng kerosene ay bababa naman ng P2.60 kada litro.
Una nang nagpatupad ng rollback ang Phoenix Petroleum noong Sabado.
Ito na ang pinakamalaking bawas presyo sa langis ngayong taon.
Ayon sa Department of Energy (DOE), ang bigtime rollback ngayong linggo ay dahil sa sobrang supply ng petrolyo bunsod ng tensyon sa kalakalan ng Estados Unidos at China.
Payo naman ng ahensya, para lalong mas makatipid ay ikumpara ang presyo sa iba’t ibang gasolinahan at sulitin ang mga diskwento at promo.
Gayunman sa kabila ng malaking tapyas sa presyo, hindi pa rin nito nalalampasan ang malaking itinaas ng presyo ng gasolina at diesel mula Enero.
Mula January hanggang ngayong June 11, nasa P11.70 kada litro ang taas presyo ng gasolina kumpara sa P8.65 kada litro na rollback.
Habang nasa P9.60 kada litro ang nadagdag na sa presyo ng diesel kumpara sa P7.60 kada litrong tapyas.
Disclaimer: The comments uploaded on this site do not necessarily represent or reflect the views of management and owner of Cebudailynews. We reserve the right to exclude comments that we deem to be inconsistent with our editorial standards.