MMDA nagpapa-saklolo sa mga Metro Mayors sa pag-develop ng mga bagong daan sa NCR
Nagpapa-saklolo na sa mga Local Government Units ang Metropolitan Manila Development Authority (MMDA) para sa paghahanap ng iba pang pwedeng gawing alternatibong ruta bukod sa mga major roads ng Metro Manila.
Inamin ni MMDA Officer-in Charge Emerson Carlos na kung bibilangin ang mga sasakyan sa Metro Manila ay kulang pa rin ang mga Mabuhay lanes na pilit nilang isinasaayos sa kasalukuyan.
Ayon kay Carlos, mas alam ng mga LGUs ang mga pwedeng gawing alternatibong ruta sa kanilang mga nasasakupan kung kaya’t kailangan nila ang impormasyon mula sa mga ito.
Nauna dito ay inamin ni Philippine National Police – Highway Patrol Group (PNP-HPG) Director Arnold Gunnacao na posibleng abutin pa ng hanggang sa kalagitnaan ng susunod na taon ang pagsasa-ayos ng mga labing-pitong Mabuhay lanes.
Sa ngayon aminado ang MMDA at HPG na may mga oras pa rin na talagang mabigat ang daloy ng trapiko partikular na sa kahabaan ng EDSA.
Ipinaliwanag ni Carlos na 300,000 vehicles per hour lamang ang kapasidad ng EDSA pero may mga pagkakataon lalo na tuwing rush hours sa umaga at gabi na umaabot ang mga volume ng sasakyan sa 800,000 kada oras.
Bukod sa paghahanap ng mga bagong ruta na pwedeng daanan, mas hinigpitan na rin ng MMDA at HPG ang pagpapatupad ng traffic rules sa mga major arteries ng Metro Manila.
Disclaimer: The comments uploaded on this site do not necessarily represent or reflect the views of management and owner of Cebudailynews. We reserve the right to exclude comments that we deem to be inconsistent with our editorial standards.