Magsisilbing bagong Commissioner ng Philippine Basketball Association (PBA) si Willie Marcial matapos siyang mapili sa ginawang pulong ng PBA Board of Governors.
Inanunsyo ito ni PBA Chairman Ricky Vargas ng TNT KaTropa.
Ayon kay Vargas, nagkasundo ang Board of Governors na gawin nang commisioner ng PBA si Marcial.
Si Marcial ay unang itinalaga bilang officer-in-charge ng liga makaraang magbitiw si dating commissioner Chito Narvasa noong Disyembre.
Mananatili pa ring media head ng PBA si Marcial na matagal na rin niyang posisyon sa PBA.
Si Marcial ang nasa likod ng “PBA Homecourt” program kung saan ay nabibigyan ng pagkakataon ang ilang mga professional players ng liga na mag-ikot sa iba’t ibang basketball courts sa bansa.
May tatlong taong termino bilang PBA Commissioner si Marcial na pwede ring ma-renew.