Habang nagno-noche buena ang karamihan, nagsagawa ng inspeksyon si Philippine National Police Chief Ronald Dela Rosa sa ilang police station, checkpoint at Luneta Park.
Kasama sina National Capital Region Police Office Chief Oscar Albayalde, Southern Police Director Tomas Apolinaro Jr., Manila Police Director Joel Coronel at Pasay Police Chief Dionisio Bartolome, sorpresang ininspeksyon ang mga istasyon ng Makati, Malate at Ermita.
Nag-ikot din sina Dela Rosa sa Luneta at tinignan ang police visibility sa checkpoint sa Pasay.
Ayon kay Dela Rosa, ayaw nilang magpakampante ngayong Pasko kaya mas mahigpit ang seguridad lalo na sa matataong lugar.
Pinaalalahan din nila ang mga pulis sa istasyon na kanilang binisita na huwag masangkot sa indiscriminate firing kagaya na lamang ng nangyari kay PO1 Arnold Sabillo na isang pulis-Montalban na naaresto dahil sa indiscrimate firing sa Pasig.
Nabatid sa police report na nakumpiska kay Sabillo ang isang 9mm Beretta na may lamang 11 mga bala habang 3 basyo naman ng bala ang natagpuan sa pinangyarihan ng insidente.
Samantala, hinikayat din ni Dela Rosa ang publiko na huwag nang magpaputok lalo sa Bagong Taon.