Sorpresang binisita ni Pangulong Rodrigo Duterte ang nasunog na New City Commercial Complex (NCCC) Mall sa Davao City gabi ng Sabado.
Personal na ininspeksyon ng pangulo ang naturang mall, kung saan 29 pang katao ang hinahanap ng mga otoridad.
Mula sa NCCC Mall ay personal ring kinausap ng pangulo sa isang closed door meeting ang mga kaanak ng mga pinaghahanap na biktima.
Maging sina Davao Archbishop at Catholic Bishop’s Conference of the Philippines (CBCP) president Archbishop Romulo Valles at Davao City Mayor Sara Duterte ay nauna nang binisita at kinausap ang mga kaanak ng mga biktima.
Alas-9:30 ng umaga nang sumiklab ang apoy sa ikatlong palapag ng naturang mall.
Anim katao na ang naisalba ng rescue team, habang sinasabing mayroon nang mga katawan na inilabas mula dito, ngunit wala pang opisyal na kumpirmasyon mula sa mga otoridad.
Kinilala ang mga ito na sina Reggen Ombain, 20 taong gulang; Jireh Duterte, 28 taong gulang; Ednard Gumela, 21 taong gulang; Dexter Gonzaga, 27 taong gulang; Ereneo Sabas Jr., 23 taong gulang; at Jose Banilad, 46 taong gulang.
Sa ngayon ay under control na ng mga rumespundeng bumbero ang sunog.