Sen. Poe at VP Binay, 1st at 2nd sa pre-election survey ng SWS at BusinessWorld

Batay sa resulta ng BusinessWorld-Social Weather Stations Pre-Election survey, nangunguna si Sen. Grace Poe, sinundan ni Vice President Jejomar Binay at ni dating Interior Sec. Mar Roxas.

Ayon sa isang analyst, lumabas na “statistically tied” ang tatlong presidentiables.

Ito ay kung pagbabasehan ang mga pinili ng 96% sa 1,200 na respondents ng nasabing survey na isinagawa noong September 2 hanggang 5 sa buong bansa, na napatunayang mga rehistradong botante.

Sa mga nasabing bilang ng mga rehistradong botante, 26% sa kanila ay bumoto kay Poe, samantalang 24% ang pumili naman kay Binay at 20% lamang ang pumili kay Roxas.

Sumunod sa tatlo ay si Davao City Mayor Rodrigo Duterte na nakakalap ng 11% na boto, Senator Bongbong Marcos at Sen. Chiz Escudero na parehong may 4%, dating Pangulo Joseph Estrada na may 3%, Sen. Miriam Defensor-Santiago na may 2% at Sen. Manuel Villar na may 1%.

Samantala, nakakuha ng 0.8% sina dating Sen. Panfilo Lacson, Sen. Alan Cayetano at Sen. Loren Legarda.