Dahil sa pananalasa ng tropical storm Vinta, pinagbawalan muna ng Land Transportation Franchising and Regulatory Board (LTFRB) ang pag-alis sa terminal ng mga bus na biyaheng Bohol at Dumaguete.
Sa abiso ng LTFRB, wala nang bus na patungo sa mga nabanggit na lalawigan ang papayagang umalis.
Tanging ang mga bus na biyaheng Samar at Leyte lamang ang pinapayagan na makaalis sa ngayon.
Nakipag-ugnayan na rin ang LTFRB sa pamunuan ng bus company na Silver Star na nauna nang nakaalis ng terminal Huwebes ng umaga patungong Bohol.
Sa halip na tumuloy, inatasan ng LTFRB ang nasabing bus na manatili muna sa terminal nito sa Laguna sa halip na dumeretso sa Matnog, Sorsogon.
Samantala, marami nang stranded na pasahero sa mga pantalan sa Cebu.