Ito ay matapos maitala ang panibagong outbreak ng avian influenza o bird flu sa Cabiao, Nueva Ecija bago pa man ang target date na December 20 kung saan matatapos sana ang disinfection process sa mga apektadong lugar.
Isa sa mga pamantayan ng World Organization for Animal Health upang maideklarang bird flu-free ang isang bansa ay ang pagsasagawa ng 90 araw na disinfection process.
Kapag wala nang naitalang panibagong kaso ay maaari nang maigawad ang bird flu-free status.
Gayunpaman, kinumpirma mismo ng Department of Agriculture (DA) na naitala nga ang panibagong insidente ng avian influenza.
Ang kumpirmasyong ito ay inihayag ni Agriculture Sec. Emmanuel Piñol, ilang araw pa lang ang nakalilipas nang mapaulat ang pagpatay sa mahigit 40,000 mga ibon sa Nueva Ecija.
Tiniyak naman ni Piñol na walang rason upang magpanic ang publiko dahil sa mabilis na aksyon ng lokal na mga opisyal.
Bilang inisyal na tugon ay pinasimulan ng DA ang random testing sa mga poultry farms sa lalawigan.