Tuluyan nang ibinasura ng North Korea ang anumang negosasyon kaugnay sa pagpapatigil sa kanilang nuclear program.
Sinabi ni Ambassador Han Tae Song na siyang kinatawan ng North Korea sa United Nations na malabong mapagbigyan ang anumang uri ng negosasyon sa puntong ito.
Isa umano sa dahilan ay ang tuluy-tuloy na war exercise sa pagitan ng U.S at ng South Korea.
Sinabi pa ng North Korean official na wala siyang natatanggap na anumang utos para sa negosasyon mula kay North Korean President Kim Jong-un.
Hindi rin umano matutuloy ang anumang pagsasagawa ng bilateral talks sa pagitan ng dalawang Korea hangga’t nakikialam ang U.S sa isyu.
Nauna nang sinabi ng U.S at South Korea na nakahanda silang makipag-usap sa mga kinatawan ng NoKor para maiwasan ang tensyon sa Korean Peninsula.
Ipinaliwanag pa ng opisyal ng North Korea na hindi nila pwedeng bitiwan ang kanilang nuclear program dahil mismong ang U.S ay gusto silang salakayin at kailangan nila ang tamang proteksyon laban sa western forces.
Nakahanda rin umano ang North Korea sa mga dagdag na economic sanctions ng U.S sa kanila.