Mag-asawa, nahulihan ng P250-K na halaga ng shabu sa N. Cotabato
Mahigit P250,000 ang halaga ng shabu na nasabat ng mga tauhan ng Philippine Drug Enforcement Agency (PDEA) mula sa mag-asawa sa bayan ng Pigcawayan sa North Cotabato.
Ayon kay PDEA-Central Mindanao director Gil Cesario Castro, naging katuwang ng kanilang mga ahente ang mga pulis at iba pang law enforcement units sa isinagawang operasyon.
Isinilbi nila ang search warrants laban kina Richard Balbini at misis nitong si Heanette na hinihinalang miyembro ng Bawan Drug Group sa Pigcawayan.
Hindi naman na pumalag ang mag-asawa nang masukol sila ng mga otoridad.
Nasamsam mula sa tahanan ng mag-asawa ang 50 gramo ng shabu, isang 9-mm na baril na may kasamang dalawang magazines at mga bala, isang caliber .22 na rifle at magazine, isang netbook, camera, ilang pass books, bank notes at Toyota Fortuner.
Mahaharap ang dalawa sa mga kasong paglabag sa Comprehensive Dangerous Drugs Act at Comprehensive Firearms and Ammunition Regulation Act.
Disclaimer: The comments uploaded on this site do not necessarily represent or reflect the views of management and owner of Cebudailynews. We reserve the right to exclude comments that we deem to be inconsistent with our editorial standards.