Kumpiyansa ang Palasyo na hindi makakaapekto sa Food Security at paghahanda ng bansa sa matinding epekto ng El Niño ang resignation ni Presidential Assistant for Food Security and Agricultural Modernization Secretary Kiko Pangilinan.
Sinabi ni Communications Secretary Sonny Coloma na nakatutok sa food security ang Food Security Council sa pangunguna ni NEDA Director General Arsenio Balisacan.
Ayon kay Coloma, ang grupo ni Balisacan ang nakatutok sa inaasahang magiging epekto ng El Niño.
Aminado naman si Coloma na wala pa siyang impormasyon kung ibabalik sa Department of Agriculture ang apat na ahensiyang pinangangasiwaan ni Pangilinan na kinabibilangan ng National Food Authority o NFA, National Irrigation Administration o NIA, Philippine Coconut Authority at Fertilizer and Pesticide Authority.