Matatandaang kamakailan ay nahuli ng mga otoridad ang Indonesian na si Muhammad Ilham Syahputra habang nagtatangkang tumakas mula sa lungsod.
Ayon kay Task Force Ranao deputy commander Col. Romeo Brawner, isa pa sa mga dayuhan na kasama ng Maute Group na nanggulo sa Marawi City ay ang Malaysian na si Amin Baku.
Ani Brawner, hinahanap nila si Baku, buhay man ito o patay na.
Sa kanilang impormasyon, isa si Baku sa mga nakaligtas sa walang humpay na pambobomba at pagpapaputok na ikinasa ng militar laban sa mga terorista sa kasagsagan ng gyera.
Sakali man na nakasama na ito sa mga napatay na terorista, kailangan pa rin aniya nilang mahanap ang bangkay nito.
Tinitingnan pa rin aniya nila ang posibilidad na baka may mga naiiwan pang dayuhang terorista sa main battle area.
Si Baku ay dating kasapi ng teroristang grupo na Jemaah Islamiyah sa Mindanao, at naging malapit din sa kapwa niya Malaysian terrorist na si Zulkifli bin Hir alyas Marwan.