PNP official, sabit sa kidnap-slay sa isang casino junket operator
Kinilala na ang isang opisyal ng Philippine National Police na lider ng kidnap for ransom syndicate na nasa likod ng pagdukot at pagpatay sa isang casino junket operator na si Carlos Tan.
Ayon kay PNP Chief PDG Ronald Dela Rosa, kinilala ang naturang opisyal na si Police Supt. Johnny Orme na nakatalaga sa Southern Police District.
Si Orme ay itinuro ng sumukong miyembro ng sindikato na si SPO1 Benjamin Pagaringan.
Si Pagaringan ay sumuko sa PNP matapos mapatay ang tatlo pang pulis at isang sibilyan na sangkot sa kidnapping at pagpatay kay Tan sa engkwentro laban sa PNP-Anti Kidnapping Group sa Carmona, Cavite.
Tinukoy ni Pagaringan si Orme bilang lider ng sindikato, habang isa namang Alex Gozum ang umano’y financier ng sindikato.
Ayon naman kay Sr. Supt. Glenn Dumlap, hepe ng PNP-AKG, matagal nang tumatambay sa mga casino si Orme, at nagpi-finance rin ng mga casino player, at siya ay kapartner ni Alex Gozum.
Sa ngayon, nagkasa na ng manhunt operation ang PNP upang mahuli si Orme, si Gozum at isa pang John Doe.
Disclaimer: The comments uploaded on this site do not necessarily represent or reflect the views of management and owner of Cebudailynews. We reserve the right to exclude comments that we deem to be inconsistent with our editorial standards.