Hindi na nagulat si University of Santo Tomas Faculty of Civil Law Dean Nilo Divina na isinama siya sa lookout bulletin order ng Bureau of Immigration kaugnay ng kaso ng law student na si Horacio Castillo III.
Ipinahayag ni Divina ang pagkadismaya niya sa desisyon.
Dumepensa naman si Divina at sinabing malinaw na wala siyang dapat panagutan sa pagkasawi ni Castillo dahil lingid sa kanyang kaalaman ang umano’y hazing sa biktima.
Aniya, wala rin siyang kinalaman sa planong pagtakpan ang insidente.
Gayunman, nangako naman si Divina na tatalima sa anumang kautusan ng Department of Justice.
Ngayong Huwebes, inatasan ng DOJ ang Bureau of Immigration na isama sa lookout bulletin si Divina kasama ang 50 persons of interest kaugnay sa naganap na hazing na ikinamatay ni Castillo.