Walang balak na tumakbo bilang senador sa 2019 si Davao City Mayor Sara Duterte.
Sinabi ni Inday Sara na mas gugustuhin niyang tumakbo bilang kinatawan sa Kamara ng 1st District ng Davao City kung siya ang tatanungin.
Ito ang ginawang paglilinaw ng presidential daughter makaraang sabihin ng ilang mga opisyal ng kanilang partido na PDP-Laban na pwede silang maglaan ng isang slot para nasabing opisyal kung tatakbo ito bilang senador sa 2019.
Samantala, pinangunahan kaninang umaga ni Duterte ang lunaching ng “Tapang at Malasakit Alliance for the Philippines” sa Bonifacio Global City sa Tauig City.
Sinabi ng Alkalde na ito ang kanilang pantapat sa mga grupong naninira at balak magpabagsak sa administrasyon ng kanyang ama.
Sa kanyang talumpati, hinimok ni Duterte ang bawat Pinoy na magkaisa na para sa ikauunlad ng ating bansa.
Masyado na umano nahati ang Pilipinas dahil sa iba’t ibang kulay ng pulitika.
Kabilang sa mga present sa pagtitipon kanina ay sina dating Pangulo at ngayo’y Manila Mayor Joseph Estrada, Presidential Spokesperson Ernesto Abella, Foreign Affairs Secretary Alan Peter Cayetano, Energy Secretary Alfonso Cusi, Ilocos Norte Governor Imee Marcos,Taguig City Mayor Lani Cayetano, Philippine Amusement and Gaming Corp. Chairman Andrea Domingo at PCOO Asec. Mocha Uson.