Mapayapa ang unang araw ng tigil-pasada ng Piston ngayong Lunes (October 16).
Iyan ang inisyal na assessment ni National Capital Region Police Office o NCRPO chief Oscar Albayalde.
Batay aniya sa mga nakuha niyang report, walang halos sumama sa transport strike ng Piston, maliban sa mga militanteng grupo gaya ng BayanMuna, Gabriela, Kilusang Mayo Uno, Courage at iba pa na nagsagawa ng protesta.
Dagdag ni Albayalde, wala rin gaanong naapektuhang pasahero, dahil mas maraming jeepney groups ang hindi lumahok sa tigil-pasada.
Pero nakakadismaya aniya na pinipilit daw ng Piston ang iba pang mga jeepney drivers na makiisa sa strike.
Umaasa si Albayalde na magtutuloy-tuloy hanggang bukas ang aniya’y peaceful strike.
Kanina sa Aurora Boulevard sa Cubao ay kakaunti ang raliyista, pero nakatikim ng sermon mula kay Albayalde ang mga ito at kahit ang mga pulis.
Nag-ikot din si Albayalde sa iba pang lugar gaya sa Welcome Rotonda at Philcoa.
Sa panig naman ni LTFRB Board Member Aileen Lizada, napakaliit ng porsyento ng naparalisang biyahe, at sa katunayan ay hindi ramdam ang tigil-pasada.