Sinabayan ng kilos-protesta ng iba’t-ibang militanteng grupo ang isinagawang nationwide transport strike ng grupong PISTON.
Sa bahagi ng Litex sa Commonwealth may mga miyembro ng Gabriela ang nagsagawa ng kilos-protesta at nakiisa sa panawagang huwag ituloy ang phase out sa mga luma nang pampasaherong jeep.
Sa Quezon Avenue naman, may mga miyembro ng KADAMAY ang nagsagawa ng protesta.
Maging ang mga miyembro ng BayanMuna at Courage ay nakiisa din sa tigil-pasada ng PISTON.
Samantala, sa Aurora Boulevard sa Cubao, nagkairingan ang mga pulis at mga miyembro ng Gabriela, makaraang sakupin at maharangan ng mga nagpoprotesta ang major road.
Nainis pa si NCRPO Chief Oscar Albayalde sa mga pulis nang datnan niya ang mga nagpo-protesta na nakarang na sa kalsada.
Aniya, iilan lamang naman ang mga nagpoprotesta pero hindi sila maawat ng mga nakabantay na pulis.
Sinabi ni Albayalde na hindi naman nila binabawalan ang grupo na magsagawa ng protesta dahil karapatan nila ito.
Kailangan lamang aniya na irespeto rin ng mga ito ang karapatan ng mga mamamayan na gumagamit ng lansangan.
NCRPO chief Oscar Albayalde, nairita sa mga raliyista dahil sa pag-okupa sa Aurora Blvd, QC. Pinagsabihan din ang mga pulis. @dzIQ990 pic.twitter.com/1L8jH7BUnB
— Isa Avendaño-Umali (@isaavendanoDZIQ) October 16, 2017
Samantala sa España Boulevard sa Maynila, pansamantala ring nahinto ang daloy ng traffic makaraang humiga sa kalsada ang mga miyembro ng militanteng grupo.