Nagkasundo ang mga senador na isapubliko ang mga naging testimonya ni John Paul Solano hinggil sa pagkamatay ng hazing victim na si Horacio Atio Castillo III na binanggit sa executive session sa senado.
Sa tatlong pahinang resolusyon na ihinain ni Sen. Juan Miguel Zubiri, pinapayagan ng mga senador sina Sen. Richard Gordon, chairman ng senate commmittee on justice and human rights at Sen. Ping Lacson, chairman ng committee on public order and dangerous drugs na ilabas sa publiko ang naging testimonya ni Solano noong September 25.
Ayon kay Zubiri, 23 mga senador ang pumabor sa nabanggit na resolusyon bagaman hindi nakapirma sa resolusyon sina Sen. Grace Poe at Leila de Lima pero ayon kay Sen. Zubiri, nagpahayag ng suporta ang dalawang senador.
Sinabi ng senador na sang-ayon sa panuntunan ng senado bagaman dapat ay hindi inilalabas sa publiko ang anumang mga impormasyon na nakuha sa isang executive session, maari naman itong isapubliko kung papayagan ng komite at sa pamamagitan ng 2/3 na boto ng mga senador.
Sa nasabing executive session, nagbanggit si Solano ng mga pangalan ng mga miyembro ng Aegus Juris na nakita niya nang siya ay dumating sa frat library noong araw na nasawi si Castillo.
